Abasimbyewo, abakulira ebyokwerinda ,n’abalondoola eby’okulonda mu Kawempe North, basisinkanye abatwala eby’okulonda, okutema empenda ku ngeri y’okubeera n’akalulu ak’emirembe.

Mu ngeri yeemu bannakyewa basabye akakiiko kaseewo embeera ennungamu okusobozesa abalonzi mu Kawempe North okuddamu okulonda omubaka wabwe olunaku olw’enkya nga 13 March,2025 mu mirembe.

Mu nsisinkano eno Ssentebe w’akakiiko k’ebyokulonda Simon Byabakama alagidde ab’ebyokwerinda okukwata emmotoka zonna ezinaasangibwa nga tezirina number plate mu Kawempe North olunaku lw’enkya okwewala okutabangula emirembe.

Bino webijidde nga waliwo ebigambibwa nti waliwo emmotoka ezirabiddwako mu Kawempe North nga tezirina number plate, nga ziteeberezebwa nti zibadde zibbirwamu obululu mu bitundu bye Nammere mu Kawempe.

 

Akulira oludda oluvuganya government mu parliament Joel Ssenyonyi awonedde watono okugajambulwa abantu abasaangiddwa mu kifo ekimu ewagambibwa nti waliwo ababadde bagololerayo obululu.

Akulira oludda oluvuganya government ng’adduka mu kikomera gy’abadde agenze okwekenneenya ebigambibwa nti waliwo ababadde babbirayo obululu bw’okuddamu okulonda omubaka wa Kawempe North

Eno bannamawulire bakubiddwa ensambaggere n’amayinja, era nga waliwo akoseddwa nebatwalibwa mu ddwaliro.

Munnamawulire ng’alaajanira wansi e Nammere gy’abadde agenze okusaka amawulire, ag’ebigambibwa nti waliwo ababadde babbirayo obululu

Wabula ssentebe w’akakiiko  k’okulonda eby’okubba obululu ng’olunaku lw’okulonda terunatuuka abisambazze.

Tusiime Gerald omumyuka w’omuduumizi wa police etwala Kampala metropolitan agambye bbo ng`ebitongole by’ebyokwerinda tebalina wadde kyebamanyi ku mmotoka ezitalina number plate, era nagamba nti emmotoka ezo webanaazirabirako bagenda kuzikwata.

 

Tanga Odio ku lw’ekibiina kya NRM, asambazze ebibadde byogerebwa ku kibiina kyabwe nti bebawendulira ab`oludda oluvuganya Abe by`okwerinda nebabakuba.
Ssentebe w’akakiiki k’okulonda Simon Byabakama agambye nti kyebasuubira kekalulu ak’emirembe, era Okulonda kugenda kutandika ku ssaawa emu ey`okumakya, kukomekerezebwe ku ssaawa kkumi  ezakawungeezi.
Akalulu Kano kavuganyizibwamu abantu 10, okuli Erias Luyimbazi Nalukoola owa NUP, Hajjat Farida Nambi Kigongo Owa NRM, Mukiibi Sadat Owa FDC, Kasaca Henry Mubiru Owa DP, Luwemba Luswa Muhammad Independent, Mugerwa Hanifah Karadi independent, Musitwa Ismail independent, Nsereko Moses Independent, Mutazindwa Muhamood Independent wamu ne Edward Stanley Owa Independent.
Omuwendo gw’abalonzi abagenda okulonda  gwalinye negutuuka Ku balonzi 199,341, bwogerageranya naabo 164,052 abaalonda mu Kalulu akaliwo mu 2021.
Okulonda kugenda kubeera miruka 9, ebyalo 47, n’ebifo ebirondebwamu 197.#