Ttiimu y’essaza Buddu ekiguddeko mu mpaka za Masaza ga Buganda ez’omupiira ogw’ebigere,  Buluuli egirumbye omwayo mu kisaawe kya Kitovu Arena mu kibuga Masaka n’egikubirayo goolo 2-0.
 
Omwaka buno Buluuli ekubye Buddu ewaka ne kubugenyi,  nga omupiira ogwasooka e Migyera, era Buluuli yaguwangula goolo 1-0. 
 
Kakaano Buluuli ekulembedde ekibinja Bulange n’obubonero 11, ate nga Buddu esigadde ku bubonero 08.
 
Mu kibinja kye kimu Gomba nayo efunye obuwanguzi obusoose mu mpaka zino bwekubye Busiro goolo 2-0 e Kabulasoke,  nga Gomba  egenze ku bubonero 5 ne basibagana ne Busiro. 
 
Mu kibinja kye Bulange Busujju ekubye Ssese goolo 2-1 mu kisaawe e Kakindu,  nga Busujju nayo egenze ku bubonero 11 ate Ssese esigadde ku bubonero 09.
 
Buweekula erumbye Bulemeezi omwayo mu kisaawe kya Kasana Luweero n’egikubirayo goolo 1-0. 
 
Ssingo nayo ekubye Mawogola goolo 1-0 mu kisaawe e Mityana. 
Bisakiddwa: Isah Kimbugwe