Waliwo ensisinkano eyenjawulo egenda okukubirizibwa eyaliko Ssabaminister wa Uganda Dr. Ruhakana Rugunda, mu maka g’omugenzi Prof. George Wilson Kanyeihamba, egenda okukola enteekateeka ezokuwerekera omugenzi.
Mulekwa Joel Kanyeihamba ategeezezza nti Nnyabwe gwe bali naye e Bungereza,yafunye obukosefu obw’amaanyi oluvannyuma lw’okufuna amawulire gookufa kwa kitaabwe, nga kati balwana okulaba ng’assuuka basalewo ekiddako.

Prof. Kanyeihamba yavudde mu bulamu bwensi nga 14 July,2025 ku myaka 85 egy’obukulu.

Yazaalibwa nga 11 August,1939.

 

Abantu abenjawulo nabakungu bakyagenda mu maaso n’okuweereza obubaka obusaasira family ya Prof George Kanyeihamba.

Prof. Ssempebwa Fredrick, munamateeka omuggundiivu nga yasomesaako ne Prof Kanyeihamba ku Makerere University agambye nti Kanyeihamba abadde wanjawulo ku bikwata ku mateeka.

Abadde alwanirira eddembe ly’obuntu, n’okuluηamya ebibiina ebyenjawulo ku nkwata y’amateeka.

Ssenkulu wa Kanyeihamba Foundation Norman Tumuhimbise agambye nti  bakutegeeza eggwanga enteekateeka zonna ez’okuziika omugenzi nga bwezinaatambula.

Prof. G.W Kanyeihamba yalamulira mu kooti ya Uganda ensukkulumu wakati wa 1997 okutuuka mu 2009.

Yoomu ku baawoma omutwe mu kubaga ssemateeka wa Uganda owa 1995.

Yaliko Ssaabawolereza wa government ya Uganda.

Yaliko omusomesa w’amateeka e Makerere University.

Bisakiddwa: Betty Zziwa