President wa Uganda Yoweri Kaguta Museveni Tibuhaburwa ayanjulidde parliament eye 12 amabago g'amateeka 38 government geyagala parliamenr yekenneenye  mu mwaka gwayo guno ogusooka 2026/2027.
Amabago gano gatereddwa mu nnambika emanyiddwanga Legislative Program ,government mweyita okwanjula eri parliament byegenda okusaako essira mu mwaka gwa parliament.
President abadde ku kisaawe ky'ameefuga e Kololo mukwogerakwe okutongole eri eggwanga okumanyiddwanga State of the National Address,mwagguliddewo omwaka ogusoose ogwa parliament eye 12.
Ssemateeka w'eggwanga ennyingo 101 (1) eragira omukulembeze weggwanga buli mwaka okwogerako eri eggwanga ng’aggulawo omuggya n'okuggalawo omwaka gwa parliament omukadde.
President era ayanjulira eggwanga ebituukiddwako mu mwaka ogukubiddwa amabega ku bikwata ku byenfuna, ebyobulamu, ebyenjigiriza, ebyokwerinda, ebyobufuzi nebirala.
Mu ngeri yeemu president alambika eggwanga  ebyo government byegenda okusaako essira mu mwaka gwa parliament omuggya.
Agamu ku mabago president gaayanjudde,  kuliko erya small Arms and light weapon control bill erigenda okuluηamya enkozesa y'emmundu n'ebyokulwanyisa ebitonotono okuli pistol n'ebirala lino nga lyakwanjulwa ministry y'ensonga zomunda mu ggwanga.
Ebbago eddala lya Universities and other tertiary institutions lino nga lyeriruηamya ebyenjigiriza mu matendekero agowaggulu saako ebbago The Education Act ( pre Primary and Post primary).
Ebbago lya the A level Currriculum Assessment and  Admission bill gano gakwata ku  kyabyanjigiriza.
Government era eyagala okukola ennongasereza mu tteeka eriruηamya government ez'ebitundu, ennoongosereza endala eziteekebwateekebwa ziggwa mu mateeka okuli erikwaata ku mmere n'eddagala ly'ebisolo
Amateeka amalala gakwaata ku misolo, nembalirira y'eggwanga ey'omwaka gw'ebyensimbi 2027/2028
President Museveni abuulidde parliament nti amabago ago mu mwaka gwa parliament guno ogusooka ,Ssaabaminister w'eggwanga ajja kuluηamya parliament ku bigakwatako.
President Museveni wabula mu kwogera kuno yebalamye okwogera ku nsonga eziwerako;
- Ebbeeyi y'amafuta eyekkanama enkya neggulo.
-Ebikweekweeto ebikolebwa ab!ebyokwerinda n'ekitongole Kya NEMa mwebamenyedde ennyumba zabantu abawerako mu nkola ey'okuzzaawo obutonde bw'ensi.
-Embeera ya bannnsi abakwatibwa ebitongole by'ebyokwerinda mu kiseera kyakalulu n'emyaka egyayita.
-Embeera yekirwadde kya Ebola, nga kino kyaviiriddeko okuyimiriza ebikujjuko by'okukuza olunaku lw'abajulizi e Namugongo, saako okuyimiriza abagenyi abaali bayitibwa okwetaba ku mikolo gino nga president ayogerako eri eggwanga.
-Museveni era yebalamye okwogera ku nsonga za eyali sipiika wa parliament Anita Annet Among era omumyuka we owokubiri mu kibiina ki NRM, agambibwa nti ebitongole byebyokwerinda byamuggalira mu Makaage n'okuwamba emmotoka ze.
-President Museveni yebalamye okwogera ku nsonga z'abasuubuzi abaagobwa ku nguuzo za Kampala, ebisale byobupangisa ebirinnya enkya neggulo saako emisolo egyekannamye egigobye abasuubuzi mu busuubuzi.
-Ensonga y'abasawo abagezesebwa abamanyiddwanga ba intern doctors government beyagambye nti tegenda kuddamu kubawa nsako, n'ensonga endala nnyingi ezikwata ku muntu wa bulijjo.
Ensako y'abakungu ba government aba Ssemugayaavu;
Omukulembeze we ggwanga Gen Yoweri Kaguta Museveni Tibuhaburwa   alabudde nti agenda kuggyawo ensako y’abakungu mu government abalemererwa okutuuka ku bantu okubayambako okuva mu nvuba y’obwavu.
  Mzee Museveni agamba nti abakulu  baziηmizza olutulo lwa government olw'okukulakulanya banauganda , nga ebiseera ebisiinga babimalira  mu Kampala mu wofiisi n'okugenda emitala w'amayanja, neberabira obuvunayizibwa bwabwe. Enguudo; President Yoweri Kaguta Museveni abuulidde eggwanga nti government efubye okukola enguudo  ezituuka mu bitundu ebyenjawulo okuli ebyalo ,ebibuga  ne Kampala ,nalagira Minister w'ebyenguudo okulondoola n'okulwanyisa ababba ensimbi ezikola enguudo. Obulimi n'obulunzi; President ategezeezza nti government etadde  ensimbi eziwera mu by'obulimi saako  okusomesa abantu okwettannira enkola z'okwekulaakulanya  omuli emyooga , Parish Development model nendala  era  nti abawulirizza okuwabulwa kwe baganyuddwa byansusso.   Agambye nti ebyobulunzi nabyo byongeddwaamu amaanyi nga kakano obungi bw'amata  agatundibwa nebikolebwa mu mata Uganda byetunda ebweru nebyo byeyongedde. Eby'okwerinda; Ku nsonga yeby’okwerinda Omukulembeze ategezeezza nti egye lyeggwanga elya   Updf likoze Omulimu gwamaanyi okukuuma obutenkevu era mpaawo kilemesa banansi okukola emirimu gyabaawe.
Ekisanja sikyakubongoota;
President Yoweri Museveni azeemu okujukiza abakulembeze ne bannauganda bonna nti ekisanja kino sikyakubongoota   era balina okwesiba ebbiri kubanga ayagala abantu abamanyi okukola. Abagenda okukuba ebyeyo; Wabula president Museveni atabukidde   banauganda abenyooma n’obutekkirizaamu naabamu nebatuuka nokuddukira mu mawanga ga Bawarabu okunoonnya emirimu, abawadde gabuwa bazuukuke nti kubanga Uganda erina buli kyetaagisa omuntu okukola.   Olutuula luno lukubiriziddwa Sipiika wa parliament  Jacob  Markson  Oboth Oboth.m naye asabye Ababaka mu Parliament eye 12 bafube nnyo  olwanirira enkulakulana ya bannauuganda nga bannyikiza enkola za government ez'okulwanyisa obwavu.#