Ttiimu ya Uganda ey’omupiira ogw’ebigere ey'abazannyi abatasussa myaka 17 eya Uganda Cubs ewanduse mu mpaka z’ensi yonna eza FIFA U17 World Cup eziyindira e Doha Qatar, oluvanyuma lw’okukola ebyafaayo mu mpaka zino. Uganda Cubs ewandukidde ku mutendera gwa ttiimu 16, bwekubiddwa Burkina Faso goolo 5-3 eza paneti, nga mu dakiika 90 omupiira guno guwedde goolo 1-1, nga eya Uganda Cranes eteebeddwa Arafat Nkoola mu dakiika eya 56. Uganda Cubs empaka zino ebadde ezetabyemu omulundi gwayo ogusookedde ddala. Ebyo nga biri bityo, ne ttiimu endala eyabazannyi eya Uganda Cubs eraze amaanyi mu mpaka za CECAFA U17 Zonal Qualifiers eziyindira mu Ethiopia bwekubye Sudan goolo 9-0. Uganda Cubs mu mpaka zino yasoose kukuba Burundi goolo 4-0, ng'amawanga gonna galwana okukiika mu mpaka za AFCON U17 ez’omwaka ogujja 2026.
Ebyo nga biri biryo, Ttiimu ya Uganda Cranes ekiguddeko, Morocco egikubye goolo 4-0 mu mupiira ogw'omukwano oguzanyiddwa mu kisaawe kya Stade Tanger mu kibuga Tangier ekya Morocco,  wakati mu kisaawe ekibadde kikubyeko obugule.
Bisakiddwa: Issah Kimbugwe