Akakiiko k'ebyokulonda ka The electoral Commission of Uganda kategeezezza nti okutwaliza awamu okulonda ku Mutendera gwa LC ey'okusatu kutambudde  bulungi, wadde nga waliwo ebitundu ebimu ebibaddemu obuvuyo.

 
Omwogezi w'akakiiko ke byokulonda Julius Muchunguzi ategezezza cbs nti alipoota zebafunye okuva mu bitundu ebisiinga obungi, ziraze nti okulonda kutambudde bulungi.
Agambye nti obumulumulu obubaddewo mu bifo ebimu, bakutuula ng'akakiiko k'ebyokulonda babeeko byebasalawo.
Wabaddewo okulonda ba ssentebe b'amagombolola ne ba kansala babwe okwetoloola eggwanga lyonna.
Mu bitundu ebisiinga obungi okulonda kutandise kikeerezi olw'abalonzi okulwawo okugenda mu bifo gyebalondera, wadde ebikozesebwa mu kulonda byatuusiddwa mu budde.
Ebitundu ebibaddemu obunkenke
Mu bitundu ebimu  okulonda abantu bakuzize, abalala abesimbyewo akalulu bakaddusseemu, abamu bakwatiddwa nebaggalirwa, saako abasirikale ababadde mu byambalo by'amagye abakubye amasasi mu bifo ebirondererwamu, nga kigambibwa nti babadde n'ekigendererwa eky'okubbirira obululu, era nga waliwo n'abantu abalumiziddwa!!
  Ssembabule Police mu Bbendobendo ly'e Masaka, ekakasizza okukwatibwa kw'abantu babiri mu kunoonyereza kweriko okuzuula abaakubye amasasi mu bantu e Ssembabule, mu kiseera ky'akalulu koomutendera gwa LC Ey'okusatu!! Omwogezi wa Police mu Bbendobendo ly'e Masaka Twaha Kasirye, agambye nti abaalumiziddwa batwaliddwa mu ddwaliro e  Ssembabule n'e Masaka Regional Refferal hospital okufuna obujjanjabi.   Buikwe Embeera yeemu erabiddwako mu district ye Buikwe etabuse, oluvannyuma lw'amagye okutabangula okulonda. Wabaddewo okubwatuka kw'amasasi mu kitundu ky'e  Mpunge Nkokonjeru , nga kigambibwa nti abavunaanyizibwa ku byokulonda balumbiddwa bannamagye mu mmotoka bbiri, nebagolola Obululu bwonna nebabuteeka mu Boxi zaabwo oluvannyuma nebeggyawo. Kino kitabudde abavunaanyizibwa ku kulonda, awo abatuuze nebasalawo okwaasaayasa boxi zonna ezissiddwamu Obululu, era okulonda nekuyimirizibwa.
E Namayingo
Amyuka RDC e Namayingo Sarah Kasadha agambye nti abantu olwalonda omukulembeze w'e ggwanga n'ababaka ba parliament nebeddirayo ku mirimu gyabwe, nebatajjumbira kulonda kw'amagombolola nr ba kansala.
Kasadha agambye nti ababadde mu lwokaano balemelerwa okukunga abawagizi babwe.
Mu ngeri yeemu Kasadha atangaazizza nekubuuma obukozeseddwa mu kulonda, nga mubitundu ebimu bukoze bulungi ate   mu bitundu ebiralal busikatidde.
Entebe
Waliwo ba Kansala basattu 3 ku kyalo Namulanda B mu Town Council eye Kajansi mu bitundu ebye Ntebe,  abatalabikidde ku bukonge ate nga bagamba nti baasunsulwa.era nebawandiisibwa.
Okwemulugunya kwabwe bakututte mu Kakiiko ak'ebyokulonda ku District eye Wakiso, kabeeko kyekabakolera.