Kkooti ya Uganda ensukulumu esazeewo  nti kimenya mateeka kooti z’amagye okuwozesa abantu babulijjo, neragira nti emisango gyonna egivunaanibwa abantu babulijjo mu kkooti y’amagye giyimirizibwe mu bwangu .

Abamulizi 7 aba kooti ensukkulumu, abakulembeddwaamu Ssabalamuzi  Chagamoy  Alphonse Owinyi Dollo,Elizebeth Musoke, Catherine Bamugemeirwe, Persy Night  Tuhaise ne Michael Chibita bebalamudde.

Ensala eno yesigamiziddwa mu kujulira okwakolebwa Ssaabawolereza wa government kweyakola mu kkooti ensukulumu oluvanyuma lwa kkooti etaputa ssemateeka, okusalawo nti abantu babulijjo okuvunaanira abantu babulijjo kimenya ssemateeka w’eggwanga.

Ssabalamuzi w’eggwanga Alphonse Owinyi Dolo nga yakuliddemu balamuzi banne okuwa ensala eno, ategeezezza bannamateeka ababadde bakubyeko mu kkooti nti ensala eyawandiikiddwa ya miko 200, era okugisoma yonna eyinza okutwala esaawa 16 nnamba.

Mu nsala emaze eggobe mu kibya essomeddwa Ssaaabalamuzi  Alphonse Owinyi Ddolo, oluvanyuma lw’abalamuzi bonna okuwa ensala yabwe, agambye nti kkooti yamaggye okuvunaana abantu babulijjo kimenya ssemateeka weggwanga era kirina okukomezebwa.
Balagidde nti emisango gyonna egivunanibwa abantu babulijjo, gyitwalibwe mu kooti zabulijjo.

Ssaabalamuzi Dolo ya kooti gy’asomye, akinogaanyizza nti abajaasi abatuula mu General court Martial, tebalina bukugu mu mateeka okuwuliriza n’okusalawo ku nsonga ezikwata ku by’amateeka.

Agambye nti abalamuzi gyebakwatira ssemateeka nebalayira okukuuma ssemateeka n’okumusaamu ekitiibwa, abajaasi bbo balayira okukuuma mukama wabwe era omudduumizi w’amaggye ow’okuntikko
Kooti etegeezezza nti ennonda y’abalamuzi  bano nga kabalonda ye mudduumizi wabwe, embeera gyebakoleramu nekiseera kyebamala nga baweereza mu kkooti eno nga byonna SSI birambulukufu, tebisobola kuwa kkooti eno obwetengereze okuwa abantu abalala obwenkanya.
Abalamuzi ba Kkooti ensukkulumu bagambye nti obuyinza bwa kkooti y’amagye bwenkankana n’obwakakiiko akakwasisa empisa nti era awo webasaanye okussa essira mu kukwasisa empisa abajaasi naye sikuwozesa misango n’okuwa ebibonerezo.
Wabula kkooti ensukkulumu ewabudde essiga effuzi erya executive ne parliament, nti bweba ayagala , ekole ennoongosereza mu ssemateeka w’eggwanga n’etteeka erifuga UPDF, eteekewo kkooti y’amagye ezituukagana n’amateeka agafuga eggwanga lino, ezisobola okutuukiriza obwenkanya eri bannansi
Bino byonna byava mu musango eyali omubaka wa Nakawa Michael Kabaziguruka gweyawawabira ssaabawolereza wa government mu kkooti etaputa ssemateeka ,ngawakanya eky’okumuwozesa mu kkooti yamagye ng’ate muntu wabulijjo atali munnamaggye
Koooti etaputa ssemateeka bweyalagira nti kimenya mateeka okuwozesa abantu babulijjo mu kkooti zamagye, ssabawolereza wa government yajjulira mu kkooti ensukulumu ngawakanya ensala eyo, wabula teyawukanye na nsala ya kooti ensukkulumu.
Bannamateeka okubadde Caleb Alaka ne Medard Lubega Ssegona abababde abasaale mu musango guno, beebazizza abalamuzi ba kkooti ensukulumu olw’ensala ey’ebyefaayo eno, era betonze olweneeyisa yabannamateeka banaabwe ebadde teggya nsa eyeeyoleka mu musango guno.

ENSALA Y’ABAMU KU BALAMUZI KINNOOMU NGA BWETAAMBUDDE

Omulamuzi  Monica Mugenyi:

yasoose okusoma ensala ye, wabula abadde yakatandika emizondaalo negivaako, awo kooti neyimirira okumala eddakiika 10.

Oluvannyuma agenze mu maaso n’asoma ensala ye, era akinogaanyizza nti kkooti y’amagye teyetengeredde era enkola yaayo ey’emirimu ekontana ne ssemateeka w’eggwanga.

Aluηamizza nti Court Martial terina bwetengereze mu kuwozesa emisango.

Ensala y’omulamuzi Catherine Bamugemereirwe;

Omulamuzi Catherine Bamugemereirwe naye mu nsala ye agambye nti abalamuzi ba kooti y’amagye balina kubeera bannamateeka, ate basookenga kukubwamu tooki ab’akakiiko ka Judicial Service Commission of Uganda.

Alagidde nti emisango gyonna egiwozesebwa abantu ba bulijjo mu kooti y’amagye gigyibweyo bunnambiro, gitwalibwe mu kooti za bulijjo.

Asaze nti etteeka erirungamya emirimu gya UPDF likolebwemu ennoongosereza, ensonga y’ebyamateeka eddemu erambikibwe.

Omulamuzi Bamugemereirwe agambye nti n’abasirikale abakola ebikolobero ku bantu ba bulijjo, nabo basaanye kuvunaanibwa mu kooti za bulijjo.

Ensala y’Omulamuzi Elizabeth Musoke;

Omulamuzi Musoke.agambye nti abatuula mu General Court Martial tebalina bukugu bwetaagisa mu kuwozesa n’okuwa obwenkanya eri abantu abawozesebwayo.

Kooti y’amagye erina kukwasisa mpisa zokka eri abasirikale ba UPDF.

Wabula singa wabeerawo omusango ogusukka kukukwasisa empisa, erina kugusindika mu wofiisi ya Ssaabawaabi w’emisango gya government, abalina okugwongerayo mu kooti endala.

Omulamuzi Musoke agobye okujulira kwa Ssaabawolereza wa Government, era  namulagira okuliyirira Micheal Kabaziguruka ensimbi zaasaasanyirizza mu musango.